Martxoaren lehen ostiralak ere Gorka Lizasoren bisita ekarri digu lehen ostiralez ‘Ostiraltxo’ saioan eta beste behin ere, tartetik txukunena egiten saiatu eta lortu duela esan beharrean gaude. Oraingo honetan denboran atzera egitea erabaki du ‘Sin Mala Intención’ taldeko buruak eta kantu paregabeak entzunarazi dizkigu hilabeteroko bere 25 minutuko tartean. Entzun ditugun kantu guztiek izan dute zergati bat, ostiraleko zerrendara batu ahal izateko.
Bruce Springsteen, Loquillo edota Berri Txarrak bezalako artista, bakarlari, bikote zein beste hainbat talde igaro dira Ataun Irratiaren uhinetatik. Txukun baino txukunago aurkeztu digu Lizasok beraz hilabete honetako bere kolaborazioa ere eta hurrengorako buruan ideiarik baldin badu ere, buruari beste bueltatxo bat emango diola zehaztu nahi izan digu. Guk ondo baino hobeto dakigu ordea, hurrengoan ere ez digula inolako hutsik egingo.
