Podcast: Play in new window | Download
Game Erauntsia irratsaioan denetariko gaiei helduz jarraitzen dugu. Oraingoan, aurten ikusiko ditugun bideojokoei begira jarri gara: Resident Evil Requiem, Grand Theft Auto VI, 007 First Light, The Duskbloods, Marvel’s Wolverine, The Blood of Dawnwalker eta beste hainbat helduko zaizkigu.
Zurrumurruak aipatzeko ere aprobetxatu dugu. Fallout 3ren berregitearekin batera, insider poloniarrek aspaldiko The Witcher III maitatuaren eduki gehigarri berria jasoko dugula esaten ari dira.
Beti bezala, estreinaldi handiak datozen arren, beharbada beste mota bateko arazoak eta oztopoak ikusiko dituzte bideojokozaleek. Zergatik? RAM memoriaren prezio igoera ikusten hasiak gara dagoeneko. Horren ondorioz, gailu berrienen prezioak ere gora egingo du: egungo kontsolen salneurriari eragingo dio, ziur asko, datozen urteotan, baina 2026an ikusi behar omen dugun Steam hardware sorta berriak jaso dezake kolperik gogorrena.
GOG plataforma zerbitzuak aldaketa handiak ikusi ditu, gainera: CD Projekt taldeak jatorrizko sortzaileari saldu dio. Michał Kiciński-k bereganatu du DRM gabeko saltoki digital ospetsua, baina, printzipioz, ez dugu aldaketa handirik ikusiko bere filosofiaren inguruan.
Nire Argigunea, euskarazko lehen abentura emozional interaktiboa
Euskarazko bideojoko berriarekin jarraitu dugu. Nire Argigunea kaleratu du Hazi Digitala estudio euskaldunak: «Euskarazko lehen abentura emozional interaktiboa» dela aldarrikatzen dute, euskal mitologiarekin lotuta, eta dohainik joka dezakegu lehen atalean dagoeneko.
Bukatzeko, Xbox-en beste esklusiboetako bat iritsiko da PlayStation 5era: iazko Avowed ARPG abentura Sony-ren kontsolan argitaratuko du Obsidian Entertainment estudioak. Berarekin batera, berritasun ugari dakartzan urteurreneko gaurkotasuna estreinatuko da: guztiak laburbildu ditugu gure irratsaioan.
