Podcast: Play in new window | Download
Urtarrileko bideojokoen estreinaldiak errepasatuz hasi dugu azken saioa. Beti bezala, estreinaldi handiak eta ezustekoak daude, baina oraingoan port-ak eta bertsio eraberrituak nagusitzen direla esan beharra dago.
Hori da gure titularren kasua. Hasteko, Final Fantasy VII Remake Intergrade arrakastatsuak Switch 2 eta Xbox Series kontsoletarako moldaketak jasoko ditu egunotan; ez hori bakarrik, jarraipenak ere kontsola hauetara iritsiko direla baieztatu du Square Enix enpresak, PlayStation-eri eta PCari gehituta. Bigarrenik, League of Legends-en borroka jokoa kontsoletan ikusiko dugu: doako 2XKO ikusgarria PlayStation eta Xbox gailuetara dator, iaz ordenagailuetan estreinatu ondoren. Gainera, Animal Crossing: New Horizons maitatuak Switch 2ko bertsioa jaso, eta hainbat eduki berri dakartzan 3.0 adabakia inplementatuko du.
Ez dira hilabeteko argitalpenak bakarrak: Pathologic 3, Cult of the Lamb: Woolhaven, Cairn zein Code Vein II kaleratuko dira, besteak beste.
Urteko lehen estreinaldiak errepasatuta, iazko bideojokorik onenei begira jarri gara; izan ere, Game Erauntsia Sariak 2025 edizioa ospatu dugu elkartean. Euskal bideojokozaleen komunitateko kideek euren hautagaiak izendatu, eta botoak zenbatzeari ekin diogu 2025eko titulurik onena ezagutzeko. Clair Obscur: Expedition 33 zoragarriak eraman ditu boto gehien, baina atzetik izan ditu Hollow Knight: Silksong edo Kingdom Come: Deliverance II. Beste hainbat kategoria daudenez, hauetako irabazleak ere azpimarratu ditugu irratsaioan.
Silksong aipatuta, Team Cherry estudioak Hollow Knighten jarraipenaren berriak utzi dizkigu. Lehen espantsio handia aurkeztu dute australiarrek: Sea of Sorrow izenpean, aurten argitaratuko da, guztiz doakoa izanik.
