Etsaindarrak azaldu duenez, errota bakoitza parke eoliko propio gisa aurkeztu dute, proiektu desberdinak balira bezala, enpresa bera egon arren atzean. “Modu horretan, nolabait, inpaktuak zatikatu egiten dituzte”, azaldu du etsaindarrak. Ingurumenean eta hegazti migrazioetan proiektuak eraginen lituzkeen kalteak gogorarazi ditu Alfarok, baina baita landa inguruko herrietako jardueretan eta bizimoduan ekarriko lituzkeen arazoak ere. Gaineratu du, herritarren interesei baino, enpresa handien irabazi asmoari erantzuten diotela modu honetako proiektuek.
80 herritar inguru elkartu ziren larunbatean Enderitzen proiektuaren aurka Haize Berriak plataformak egindako agerraldian, eta hurrengo asteetan ekimen gehiago eginen dituztela iragarri dute. Alegazioak aurkezteko epea ekainaren 11n bukatuko da, eta kontzeju eta udalak horretara bultzatu nahi dituzte plataformatik. Bestetik, ostiral honetan bilera irekia deitu dute Etsainen, 19:00etan.
